An Kama Mutane 40 Bisa Zargin Tayar da Tarzoma A Lokacin Zaben Gwamna A Zamfara

  

Rundunar ƴan sanda a jihar Zamfara ta ce ta kama ɓata-gari 40 waɗanda ake zargi sun mayar da murnar cin zabe zuwa tarzoma, wanda ya janyo lalata da kuma satar kayayyakin gwamnati a ofisoshin jam'iyyar APC da kuma gidajen mutane wadanda yawanci ƴan siyasa ne.

A cikin wata sanarwa da ƴan sanda a jihar suka fitar ta hannun kakakinsu SP Mohammed Shehu, ta ce kwamishinan ƴan sandan jihar CP Kolo, tare da haɗin-gwiwar sauran hukumomin tsaro, sun yi kokari wajen shawo kan al'amura, inda bayan nan suka kama mutum 26 waɗanda ake zargi da hannu a lamarin.

Sanarwar ta kuma ce binciken da ƴan sanda ke ci gaba da yi, ya sanya sun kama ƙarin mutum 14 da kuma ƙwato kayayyaki da ɓata-garin suka sace.

Kwamishinan ƴan sandan ya yi kira da a kwantar da hankali, inda ya tabbatar da cewa suna bincike da nufin kamo waɗanda ake zargin sun tsere da kuma masu taimaka musu domin ganin an hukuntasu.